ഓർമ്മകൾ ഉണ്ടായിരിക്കണം

“മിടുക്കും ശൗരവുമെല്ലാമെടുക്കും നാസ്തിയാം നിന്റെ കടുപ്പം കാട്ടിലെങ്ങാനും കിടക്കും വാനരത്തോടും,

കടക്കണ്ണും ചുവത്തികൊണ്ടടുക്കും, വിക്രമീപ്പല്ലു കടിക്കും, പർവതം തല്ലി പൊടിക്കും പാദപങ്ങളിട്ടിടിക്കും
വല്ലതും ചൊല്ലി ചൊടിക്കുന്നതെന്തിന് ഭീമാ ?”

കല്യാണസൗഗന്ധികം തുള്ളലിൽ നിന്നാണെന്നു പറഞ്ഞു പണ്ട് ചിറ്റ കാണാപാഠം പഠിപ്പിച്ചതാണ്‌ !

രണ്ടാമൂഴം വായിക്കുന്നതിനു മുൻപേ തന്നെ , ഇക്കാരണത്താൽ, നമുക്ക് ഭീമനോടും ഹനുമാനോടും വലിയ മമത തോന്നിയായിരുന്നു. ബുക് വായിച്ചതിൽ പിന്നെ മമത ആരാധനയായി.

ഭീമാകൃതിയിലുള്ള ആ യോദ്ധാവിനെ പിന്നെ ‘ഊരുഭംഗം ‘ എന്ന ഭാസ നാടകത്തിന്റെ പുനർവായനയുടെ കണ്ണാടിയിലൂടെ നോക്കി : അയ്യോ, ഭീമൻ ചതിച്ചോ , എന്നും തോന്നി.
ഓർക്കാൻ കാരണമുണ്ട്…

**
അച്ഛനും അമ്മയും ജോലി ചെയ്തിരുന്ന തിരുവനന്തപുരത്തെ ഓഡിറ്റ് ഓഫീസിന്റെ സുന്ദരമായ ഓർമ്മയിൽ , സിവിൽ സെർവിസിൽ ഓപ്ഷൻ ടിക്ക് ചെയ്തപ്പോൾ, ആദ്യത്തെ നാലിൽ ഞാൻ പ്രാർത്ഥനയോടെ ഓഡിറ്റ് ആൻഡ് അക്കൗണ്ട് സെർവിസും വെച്ചു.
ഓർക്കാൻ കാരണമുണ്ട്…

ഓഡിറ്റ് ആൻഡ് അക്കൗണ്ടന്റ് ജനറലിന്റെ വക വിശദമായ റിപ്പോർട്ട് വന്നിരിക്കുന്നു : സംസ്ഥാന ധനകാര്യ വകുപ്പ് ശ്രദ്ധിക്കേണ്ട വിഷയങ്ങൾ.
വായിച്ചപ്പോൾ തോന്നി, ഭഗവാനെ, നമ്മൾ ഇരിക്കുന്ന ശിഖരം മുറിക്കുകയാണല്ലോ/ നിൽക്കുന്ന നിലം കുഴിക്കുകയാണല്ലോ പലപ്പോഴും! കൊടുക്കേണ്ട പ്രാധാന്യം കൊടുത്താൽ വലിയ ദോഷങ്ങളിൽ നിന്നും കര കയറുവാനാകും. പക്ഷെ റിപ്പോർട്ടിൽ പറയുന്നത് ധനകാര്യ വകുപ്പ് വർഷങ്ങളായി തുടരുന്ന തെറ്റായ പ്രവണതകൾ തിരുത്തുന്നില്ല എന്നാണ്…പൂച്ചക്കാര് മണി കെട്ടും? എത്ര എഴുതിയിട്ടും ഓർക്കാത്തതെന്തേ?

( ധന കാര്യവിഭാഗത്തിനെ വിത്ത് വിഭാഗമെന്നു പറയും ഹിന്ദിയിൽ! വിത്ത് ഗുണം പണ്ടേ പത്തു ഗുണമാണല്ലോ… )

ദുര്യോധനനാണോ ഭീമനാണോ വില്ലൻ? രചിച്ചത് ഭാസനോ എം ടി യോ?
ഞാനോ നീയോ ശരി? കണ്ണാടി എന്റെയോ നിന്റെയോ?

കുഞ്ചൻ നമ്പ്യാർ തന്നെ ശരണം…

നോക്കെടാ നമ്മുടെ മാർഗ്ഗേ കിടക്കുന്ന മാർക്കട നീയങ്ങു മാറികിടേഷടാ
ദുർഘട സ്ഥാനത്തു വന്നു കിടക്കുവാൻ നിനെക്കെടാ തോന്നുവാൻ എന്തെടാ സംഗതി?

അങ്ങനേയും തോന്നാം !
അല്ലെങ്കിൽ സഹായിക്കുവാൻ വന്ന കൂടപ്പിറപ്പാണ് എന്നും മനസ്സിലാക്കാം!

**