ചിത്രഗുപ്തൻറെ നോട്ട്-ബുക്കിൽ നിന്നും:
ശ്രീമതി സൗദാമിനിയമ്മ VIP : പകല് മുഴുവനും പറഞ്ഞും/ ചെയ്തും തീർത്ത കുനിഷ്ട്ടും കുന്നായ്മയും ഒരു ചെറിയ കുന്നിനൊപ്പം വലിപ്പം. സ്വന്തം ബന്ധത്തിലെ ഏറ്റവും പാവപ്പെട്ട സ്ത്രീയുടെ കട ബാധ്യസ്ഥത മുതലാക്കി , മുപ്പതു വെള്ളി കാശിനു തന്ത്രപൂർവ്വം അവരുടെ ലക്ഷങ്ങൾ വിലമതിക്കുന്ന സ്ഥലം സ്വന്തമാക്കാൻ കരുനീക്കം ചെയ്തു.
സ്പെഷ്യൽ കുറിപ്പ് : ഈ ആഴ്ച, ശ്വാന പ്രദർശനം അഥവാ ഷോ, ചൂല് പിടിത്തം അഥവാ വൃത്തിബോധം ആഹ്വാനം, ബഡായി പറച്ചിൽ അഥവാ എന്നേക്കാൾ മിടുക്ക് ഈ ഭൂലോകത്തിലാർക്ക് ? തുടങ്ങിയ മെഗാ പരമ്പരകൾ സ്വന്തം ജീവിതത്തിൽ ആഘോഷിക്കാൻ പരിപാടി ഇട്ടിട്ടുണ്ട്.
ഇന്നത്തെ പ്രത്യേക സംഭാവന : അൻപതിനായിരം കാണിക്കപ്പെട്ടിയിൽ. അതിന്റെ ഫോട്ടോ സെൽഫിയെടുത്തു ട്വിറ്ററിൽ/ഫേസ്ബുക്കിൽ ഇട്ടു. “എല്ലാം ഭഗവാന് ” എന്ന ശീർഷകത്തോടെ. കിട്ടിയത് 55 ലൈക്ക് , 13 കമെന്റ്., 4 റീട്വീറ്റ്
രാത്രിയിൽ ഉറക്കം കഷ്ടി.
**
ശ്രീമതി സരസമ്മ ബന്ധു :
കയ്യിലുള്ള ഭൂമി നിവർത്തിയില്ലാതെ ബന്ധത്തിലുള്ള ‘സൗദാമിനിയെന്ന മൂശേട്ടയ്ക്കു’ / ധനാഢ്യയ്ക്കു കൈമാറിയതിന്റെ ഒടുങ്ങാത്ത സങ്കടം. ദിവസം മുഴുവനും, ശപിച്ചും, കരഞ്ഞും, പ്രാകിയും നീക്കി.
മകൻ ജോലിയും കൂലിയുമില്ലാതെ നടക്കുന്നതിനു പുറത്തുള്ള ദുഃഖം വേറെ. എങ്ങനെയെങ്കിലും അവനെയൊന്നു രക്ഷപ്പെടുത്തണം. അങ്ങനെ , ചുമതല ബോധമില്ലാത്ത മകന് ബിസിനെസ്സ് തുടങ്ങാനാണ് സ്ഥലം വിറ്റത് .
അന്ധമായുള്ള പുത്ര സ്നേഹം. ഗുണദോഷിച്ചു വളർത്തിയില്ല. അധ്വാനിച്ചും, പട്ടിണി കിടന്നും, മകന് ആഹാരം ഉണ്ടാക്കി കൊടുക്കുന്നു. ‘പോയി, ജോലിയെടുത്തു ജീവിക്കെടാ’ എന്ന് പറയാനുള്ള മനോഗുണമില്ല. ‘എന്റെ ചെറുക്കൻ വിയർപ്പൊഴുക്കാനോ ? അതിനാണോ ഞാൻ അവനെ MA വരെ പഠിപ്പിച്ചത്? അവൻ സ്വന്തമായി സർക്കാർ ജോലിയെടുക്കും. ഇല്ലെങ്കിൽ ബിസിനസ് ചെയ്യും.’ എന്ന് വലിയവായിൽ എല്ലാരോടും ഇന്നും തർക്കിച്ചു.
‘എൻറെ സരസമ്മേ ! നീയാ ഇവനെ വഷളാക്കിയത് ,’ എന്ന് പറയുന്നവരെ ചതുർത്ഥി.
ഉറക്കം : വളരെ കുറവ് .
***
ശ്രീമാൻ പുത്രൻ/ റിബൽ :
തന്നെക്കാൾ ബുദ്ധിയും, ശക്തിയും ആർക്കും ഇല്ല എന്ന മട്ടും ഭാവവും. തീറ്റിപ്പോറ്റാൻ അമ്മ കഷ്ടപ്പെടുന്നത് ‘അതവരുടെ ചുമതല’ എന്ന മട്ടിൽ ഇരുപത്തഞ്ചു വയസ്സിലും നിസ്സംഗത. മൊബൈൽ ഫോണിൽ ചാറ്റിങ്, കൂട്ടുകാർക്കൊപ്പം ചുറ്റിയടിക്കുക, അമ്മയെ പൈസയ്ക്ക് വേണ്ടി നിരന്തരം ശല്യപ്പെടുത്തുക, ജോലിയ്ക്ക് വേണ്ടി തീരെ ശ്രമിക്കാതിരിക്കുക തുടങ്ങിയ വിനോദപരിപാടികൾ. ചില്ലറ മോഷണവും, കഞ്ചാവും, കള്ളു കുടിയും പരീക്ഷിച്ചു പോരുന്നു. പെട്ടെന്നൊരു ദിനം താൻ ഹീറോയാവുന്നതു സ്വപ്നങ്ങളിൽ സ്ഥിരം കാണുന്നു.
ഉറക്കം : യാതൊരു ആദിയും അന്തവും ഇല്ലാതെ. പകലും, സന്ധ്യക്കും, രാത്രിയിലും എപ്പോഴും ആവാം.
***
കുമാരി പുത്രി : അമ്മയുടെ കണ്ണിൽ വിലയില്ലാത്തവൾ. “ഇതിനെ ഇനി കെട്ടിച്ചു കൊടുക്കണമല്ലോ,” എന്ന് കേട്ടുകേട്ട് മടുത്ത് ,എങ്ങനെയും രക്ഷപ്പെടണം എന്ന് മാത്രം വിചാരിക്കുന്നവൾ.
ഡിഗ്രിയ്ക്ക് വിട്ടില്ല. തുന്നലും ബ്യൂട്ടി പാർലറും കോഴ്സുകൾ ചെയ്തു , നാട്ടിലുള്ള ‘ഐശ്വര്യ റായ് ബൗട്ടിക് ആൻഡ് ബ്യൂട്ടി ക്ലിനിക്കിൽ’ പണിയെടുക്കുന്നു. അമ്മ , തനിക്കും കൂടി അവകാശപ്പെട്ട സ്ഥലം ചേട്ടന് വേണ്ടി വിൽക്കുന്നതിന്റെ രോഷം ഫേസ്ബുക് സുഹൃത്തായ സുമുഖസുന്ദരൻ എന്ന വ്യക്തിയുമായി രാത്രി മുഴുവനും ചർച്ച ചെയ്യുന്നു.
ഉറക്കം : സുഖമല്ല
***